Bible Reader



Amashiwi yakulondolola pali ici citabo

Ukufuma e shina lya ici citabo. Ili shina elitweba umulandu waba muli ici citabo. Ici citabo cilondolola ifyo abena Israeli bafumine mu calo ca Egupto, umo bateekelwe ubusha. Pakubalubula mu busha bwa mu Egupto, Lesa abomfeshe umubomfi wakwe Mose.

Umulandu wakulubuka no kufuma mu busha bwa mu Egupto, e mulandu wacindamisha pa fintu fyonse fyacitikile abena Israeli mu Cipangano Cakale. Imilandu iyalondololwa mu citabo ca Kufuma kuti twayakanya mu fipande fine (4).

(1) Icantanshi Lesa alubula abena Israeli mu busha.

(2) Ulwendo lwa bena Israeli ku Lupili lwa Sinai.

(3) Lesa apangana icipangano na bena Israeli ku Sinai, abapeela na mafunde ikumi limo (10) ayali nokubatungulula mu bumi bwabo pakwikala nga bantu bakwa Lesa.

(4) Amafunde palwa kupanga Itenti lyakupepelamo Lesa na ya pa fintu bali nokubomfyamo na ya pali bashimapepo ne mipepele.

Ici citabo cakomaila nganshi mukulondolola ifyo Lesa acitile pakulubula abantu bakwe abali mu busha na pakuti baluke umushobo uwaba ne subilo mu fingabeshila kuntanshi.

Umuntu walumbukisha muli ici citabo ni Mose uo Lesa asalile ukufumya abantu bakwe mu calo ca Egupto. Elyo icipande caishibikwa nganshi, cipande calondolola ifyo Lesa apeele Ifyebo ikumi limo (10) pa lupili lwa Sinai (Ukuf 20).

Imilandu yatantama ifi

Abena Israeli balubuka, bafuma na mu Egupto 1:1—15:21

a. Abena Israeli baba abasha mu Egupto 1:1-22

b. Ukufyalwa kwakwa Mose no bumi bwakwe mu bwaice 2:1—4:31

c. Mose na Aroni balanda ne mfumu ya mu Egupto 5:1—11:10

d. Ipasaka nangu Icakucilila, bafuma mu Egupto 12:1—15:21

Ulwendo lwa kufuma kuli Bemba Wakashika ukufika ku lupili lwa Sinai 15:22—18:27

Amafunde yakwa Mose ne cipangano 19:1—24:18

Itenti lya cipangano na mafunde ya pa fyakupepa Lesa 25:1 – 40:38